شعر شعبي عراقي
شعر شعبي عراقي للأب
شجاني أو من جديد أنوب حبيّت
جنت عاقل ، وأكيد اوياك جنيّت
تبت توبه نصوحه أمن العشك دوم
أو على فيض المشاعر حرس خليّت
إقفلت كلبي قفل مرعوب وبليل
عجيبة اشلون كلي الكلبي طبيّت
للعشرين جن أرجعت وياك
أو جن كبلك ولا فد يوم حبيّت
على رموشك كحل ، من حزن ودموع
أو على وركة خريفي أفراح نديّت
يا عين التشيلك يا شمس آب
اشيلنّك جمر لو الك صديّت
فداك الراح كله ، أو أنذر الجاي
أو عمت عينه اليكلك يوم ضحيّت
يا آخر ملاذ ابشحة الطيب
أو بيت انته أو فداك ايروح كل بيت
تمنيتك تجي، ابأول اللجمات
واشكد احلمت بيك او تمنيت
لو تدري فرحتي ابجيتك هاي
او لو تدري اشجبت وياك من جيت
جبت بسمه لشفافي العطشن اسنين
وألف جرح ابجرح بالروح داويت
كلي اذنوب أدري ، او روحك ايمام
نزعت الماضي وابيض كلب طبيت
ومن نور البروحك شاهت العين
أو كبل ما طوف بعيونك تحفيت
أعيشك لحظة لحظة أو اشكي الفراك
أنت وياي كلك وآنه سليّت
ريتك تبقى كتلك ، ريتك اوياي
أو كلشي البيك اسمعه ايكول ياريت
كبلك ما عشت ، مو عمر محسوب
خشبة كنطرة أو للدوس ظليت
شعر شعبي عراقي عن الحب
بغيابك حبيبي اشلون اصبر الروح
يا حال اليظل على حالي من تروح
جرحك بالكلب داويته بس ما طاب
وبطاري السفر زيدت قلبي اجروح
ما انساك لو سافرت عشر اسنين
وشوكت ما ترد باب القلب مفتوح
يمي انته واحس بيك ابعيد
وابد ما فكرت يجي يوم مني اتروح
صحيح اني كتلك سوي كلشي اتريد
بس على البعد كتلكهذا ما مسموح
النفس انته الاشمه ولو تروح شلون
شلونا تريد اعيش اني بلياك
واني اشتاقلك من انته موجود
من تبتع اظل لصبح ما انام
واذا ما تصدك نجوم السما شهود
اموت اني بغيابك لمن تروح
لن حبك بكلبي ماله حدود
يوم التسافر احجز لشخصين
لان ميم بالميه وياك قلبي ايروح
وشما تبتعد خليه دوم وياك
احس ما يظل بروحي بس مذبوح
شيبفالي بحياتي وانته ماموجود
بس هم واذيه والم وجروح
رسمك كمت اشوفه من اغمض العيون
ولو يعمن عيوني ما اضنه يروح
ما أريد احظنك لو صار الوداع
لان من أهدك تطلع الروح
عشكتك وادري اتعب ابحبك
رضيت بقسمتي وملهوفه تدريني
اريد اكضي العمر وياك
تدري انت بغيابك حيل تأذيني
عيني الما تشوفك تنعمي وللدوم
لأن أنت حبيبي فرحة اسنيني
تعال وخل أضمك حيل يهواي
وأريد ابكل حنانك أنت تحويني
تعال وخل نطفي الفركه والنار
وعلى صدرك أنام الليل خليني
طويناها صفحتك ونتهه الموضوع
فعل ماضي صفيت وخلصت المدة
اشتتوقع أبوس اجدامك من تروح
واسحك كبريائي واطلب النجدة
صح جدمي عثر من شفت طولك لاح
لكن مانخيتك من طحت عمده
توجيت اعله جرحي وما طلبت العون
لان ادري اليطيح اجفوفه لتسنده
صح الكمر اكبر ونجوم أزغار
بس تحله السمه مو بالكمر وحده
وإذا ساكت تره مو لان ماكو السان
مرات الصمت من الحجي ابده
شعر شعبي عراقي عن ألم الحب
بعد لا تسأل عليه...وبعد ما أسأل عليك
بعد مالك غرض بية …وبعد مالي غرض بيك
بعد إيدك عن أدية …مو قليل الصار بية
أنته من إيدك جبتها … سوالفك عمت علية
انت مو يمي احسك … ما يهمك غير نفسك
…أنت مو مثلي تعاني …ما تحبني أنت أناني
ماكو داعي وياك ابقى…يجوز عندك محب ثاني
ماكو داعي المن اجيك…بعد مالي غرض بيك
اعترف جنت أنا أحبك …وسهرت لجلك ليالي
ردت أحط كلبي على كلبك …لجن كلبك طلع خالي
أنا دايخ بيك اهمن … وانت جدا لا أبالي
كلبي من عرقة شلعتة…عود شايف روحك انتة
اكو واجد من حلاتك …وبيهم احلى من صفاتك
صح حلو وتخبل انتة …وهوة مو كل حلو زين
روحي تشبك على روحك…وفرق عن شبك الادين
بشوفتك خلصت عيني … وكمت أحس ما عندي عين
وياك ابقى مستحيل … لازم اختار البديل
إذا لازم انسحب … بلكي اشوفلي محب
وانتة بلكي تشوف غيري… وتنسعد يابن الحلال
وبلكي تدخل قفص ثاني…وتشوف بية راحة البال
راح أكلك روح عني …وبعد ما أكلك تعال
ماكو داعي نضل سوية … مو شبعنة من الأذية
الدنيا بيها هواي غيري… الدنيا مليانة بنات
يل جنت حاضر بكلبي … تسجلت وي الغياب
شوف حالك وستراح … كافي خل ننسة الجراح
كافي رحمة لوالديك … الله لا يرضى عليك
بعد مالك غرض بية …وبعدمالي غرض بيك
شعر شعبي عراقي حزين
مو ميت عدل وإكبالي أشوفك دوم
وأتامّل رحيم الغيبتك رجعة
ما صدّك غفل يا بويا عنّي تروح
مستعجل تريد فراكنا بسرعة
كدّامي القلم كلّ ساعة أشمّن بيه
بلكي علقلم نيشان من صعبة
وشكد ذكريات مخلي عالورق
وحجايات حلوه أبالي متجمعة
نقرى بدفترك حد ما تطيح عيون
والبوم الصّور نشتاق ونطلعه
عيني عالدّرب من ربعك إيردون
أكولن بلكي أشوفن جاي وي ربعه
ويطول انتظاري أو وكفتي علـ باب
عين اتاني تبقى وعين بالدّمعة
شريد أنسى يمّا منيلّي النّسيان
هو الجرف ينسه الماي ويودعه
يا بويا العراقيّة تسولف بيك
لمّن تذكر اسمك كلبي اتكطّعه
تبقى عيوني تربي مكابل الشّاشات
بلكت صورتك لو صوتك تسمعه
ظلمة ليل صارت دنيتي بلياك
يلحاروك حياتك للوطن شمعة
أنت وكل شهيد والطّاح وفّه الكاع
يا سيف العراق أو مهرته ودرعه
اقتع روحي يمكن لو كلت أنساك
بس كلبي الدّفنته ويّاك شيقنعه
