شعر سوداني

شعر سودانيجمعنا لكم في هذا المقال قصائد سودانية متنوعة بالفصحى والعامية، ومنها:

لو جراح الغدر مرة..

بكرة بتطيب الجراح..

لو جفا الأحباب أمرا..

افتح أبواب السماح..

الجراح بكرة بتهون..

اطرد الهم والظنون..

المقدر هو البكون..

طالما قلبك حنيّن..

شوف عمايل الريدة فيك..

قلبي يا مسكين وهيّن..

السماح للغدروا بيك..

اصلو ظلم الدنيا بيّن

انتي مهما تغيبي عني..

لحظة ما بتفوتي مني..

عايشة فيا.. وساكنة جواي

في خواطري.. وفي مشاعري..

وفي تسابيحي.. وغناي

زي فرح ما ليهو آخر..

شوق سنين لزول مسافر

راجي الزمن في يوم يجيبو..

لديارو.. و لحبيبو

والفريق يفرح.. يغني..

انتي مهما تغيبي عني

لحظة ما بتفوتي مني

سال من شعرها الذهب.. فتدلى وما انسكب

كلما عبثت به نسمة.. ماج واضطرب

النسيمات والخصل.. فى عناق وفى غزل

نسجت حوله القبل. موكبا يغزل الطرب

فيه من سمرة الأصيل.. شعرها المذهب الجميل

ثغرها اليانع البليل.. كرزة حفّها العنب

يا حبيبى … أكلما قلبىّ المغرم احتمى

بك وانزاح ملهما.. عاد كأسا بلا حبب

فاره.. مترف.. لدن.. فنن.. لا.. ولا فنن

هزني الوجد والشجن.. فى الهوى قلبى اغترب

رقص الورد والزهر.. مهرجانا على النهر

سال فى الشط وانهمر.. عطره الحلو.. وانسرب

أي غصن إذا انثنى.. فيه تحتفل الدّنا

والثريات والسّنا.. غير بدري إذا احتجب

عشت فى الحب منتهى التيه .. ولكن بلا انتهاء

تائه .. ذاهل النّهى.. شفّنى الوجد والطرب

إن تكن أنت لم تزل.. يوم بدر المنى اكتمل

نحن شلناك فى المقل.. وقعدنا على اللّهب

في الجمال قبلك خيالي

لوحة كان فان جوخ رواها

غنية في الزمن المثالي

سيمفونية بلا نهاية

في ربيع أحلى الليالي

نجمة في أعلى المجرة

تضوي للشهب العوالي

نفحة بالطيب والمحبة

علمت روحنا التعالي

إيه أقول يا نور عيوني

كيف نلوم عصفور حِنيّن..

مرة بيقاسي الرياح..

مرة تلقاهو بيغني ..

فوق فريعو مع الصباح..

مرة في وادي المحنة..

ومرة في ابعد بطاح..

طاوي حريتو في جناحو..

عمرو ما ملَّ الرواح

ما هو صوتك ديمه ساكن

زكري من صوتك كفاية

صوتك المعسول يدندن

يبقي لي إحساسي غاية

كل ما يغريني شوقك

اكتب الأشواق رواية

ما بظن من غيرك أعشق

وأبدى من أول بداية

بس فراقك لي قاسي

وببقي صامد للنهاية

مابسيب عنيك تحزن

أصلي عشمان بيك معايه

من عنيك ياغالي تسلم

تبقي نظراتك شفايه

مابسيب ريدك وامشي

بس سلامك لي كفاية

يا سلام….

يا سلام لو ترضى علينا ..

تدينا قليل من حِنك…

أو تسأل مرة عيونا ..

كيف بالأشواق حاضننك

لو تسأل يوم تلقانا…

كل ثانية بنسأل عنك

كل لحظة هواك معانا..

ويا غالي سنين راجنك

وما قالوا عليك حنيّن..

بس نان وينا الحنية؟

لا تسأل يوم عن حالي…

لا تشوف الباقي عليا

الببقى علي أنا هين..

لو أنت بتقبلو ليا

أُمي يا اجمل كلمة بقولا

يا احلي نشيد يا نغمة جميلة

أُمى جناح من رحمة ونور

أُمى حنان وامل وشعور

امى حنينة بنزورا.. نحن وهي تجينا

بتربينا وبتراعينا وتسعد بينا

تخلى حياتنا تملى جميلة

واحلي نشيد

نقولو نرددو يوم العيد

كل الحبايب بزعلوا.. يا حبيبي لكن ما كده

شوف كم زمن وأنا يا جميل..

حولك بفاوض المستحيل..

في ظروف غريبة معقدة

كل الحبايب بزعلوا.. حبيبي لكن ما كده

ناديت هواك بأعلى صوت..

ما لقيت معاك غير السكوت

دمعات تجي.. ودمعات تفوت..

والحلوة بينا مسهدة

كل الحبايب بزعلوا حبيبي لكن ما كده

ممكن أكون غلطان معاك..

في كلمة جات من غير قصد

حساس وحاتك يا ملاك..

يا رقة الندى والورد

والحلوة بينا مسهدة

وكل الحبايب بزعلوا.. يا حبيبي لكن ما كده

لما ترجع بالسلامة

وترجع أيامنا الجميلة

يا سنا الروح ويا مداما

ويا عوطفنا النبيلة

تهدي ليلاتنا ابتسامة

من زمان بنقول حليلا

يوم رحيلك يا حبيبي

شفت كل الكون مسافر

لا زهر في روضة غنا

ولا زهر عطر بيادر

لا تلاقي يروي شوقي

لا حديث يجبر بخاطر

الشهور يا ريتا تجري

وكل يوم يا ريتو باكر

لما ترجع يا ربيعي

للقليب المشتهيكا

وزي عوايدك تحتويني

رعشة من الشوق إليك

عيونك الضحاكة تبكي

والمشاعر فايضة بيكا

يا حلاتك يا ربيعي

ويا حلاة الدنيا فيكا

خطواتا وهي بتعدي..

ونظراتا فيهم تحدي..

وكلماتا أنا حافظاها عندي.. شعار وهوية..

هي جميلة.. لكن قوية..

هي بسيطة.. هي دغرية..

هي عظيمة.. هي حربية… سودانية..

يا ناس الله عليها..

توبا لايق عليها..

والحنة الفي ايديها.. سودانية..

قارية الدنيا بعينيها..

ماشة وواثقة في مشيها..

بتزيد الهمة فيها.. والحنية..

تحت الشمس الشديدة..

واقفة.. ووقفتا عنيدة..

حامدة الله البريدا.. صادقة.. ونقية..

شاقة طريقا بي ايدا..

مالية العالم بي ريدا..

ودماها الفي وريدا… سودانية..

نادوا الطير البغني..

يمشي ويحكيلا عني..

أنا بهواها لأني… أنا هيا

بتوسلك ما تسدي باب

أنا من دروب الريح بجيك

واستأذنك

شان أدخلك

وأرسم ملامحك من جديد

عصفورة أو طفلاً سعيد

راكوبة أو ظلاً مديد

قمرية في غابة نخيل

طورية أو منجل في إيد

تمرة وشديرة برتكان

شادوف علي الجرف البعيد

خلوة وتسابيح في الآذان

إبريق وسبحة وكم مريد

وأستأذنك

شان أدخلك

وأبداكي من أول جديد