اشعار التجاني حاج موسي

أشعار التجاني حاج موسى

فيما يأتي أجمل أشعار التجاني حاج موسى:

قصيدة قصر الشوق

أقول أصبر على الهجران

أقول أنســـــــــــــاك لا بدا

أشوف بس طرفك النعسان

تخوني القوة والشـــــــدة

تصبر قلبي على الهجران

يثور مــــــاضينا ويتحدى

يا قصر الشوق لو هـداك

حبيبك ومر ليك صـــــــدا

بأبنيك بغلاوة الـــــــــريدا

مــــحال أنا قصري يتهدا

أهي الأيام بــتــــتــعــــدى

ونـــرجع تاني لا بــــــــدا

وحات عمراً قضيتوا معاك

محــــال عن ريدك ارتــــدا

وراجي العين تلاقي العين

وأحضــــــــن إيدك البضة

وأهي الأيـــــــــــام بتتعدى

ونرجع تــــــــــــــاني لا بدا

باب الريده وإنســـــــــــــدا

نقول يا ربي إيه جّــــــــــــدا

تمر أيـــــــــــام وتــــــتعدى

ونقعــــــــد نحسب في المدة

مهما أجــــــــــــرب النسيان

ألاقي الشــــــــــــــــــوق يمتد

ما باب الريـــــــــــــدة وانسد

قصيدة جاي تفتش الماضي

وجاي تفتش الماضي؟

خلاص الماضي ولىَّ زمان

وجفت مقلتى الباكية

ونامت من سنين أحزان

وجاى تفتش الماضي؟

أرجع بالزمن مرة وأتذكر حكايتي معاك ..

تلاقي القصة – جد – مرة

هل راعيت شعور مضناك؟!

كلما تزيدنى في هجرك

أقول ليك زيدني ما أحلاك

لا شفع التوسل فيك .. ولا حرماني يوم هماك

وجاي تفتّش الماضي؟

وجيت تترجى بالدمعات…

أسامحك أنسى أغفر ليك؟

جفّف دمعك الغالي..

مسامحك وما عشان عينيك..

عشان تتعلم الغفران..

وتصفح لو زمن جار بيك

وحاول لو قدرت كمان

تقدر رقة الحابيك

وجاي تفتش الماضي؟

وعزة نفسى مابيه على

أسلم قلبي ليك تاني..

سنين الهجر بيناتنا

وحاجات تانية حامياني

ولو رجع الحنين وعاود

وليك من تاني وداني

ولو مكتوب ليَّا تاني أحب

بحب إنسان يكون تاني

قصيدة واحشني

واحشني يا الخليت ملامحك.. في حياتي…

واحشني يا الرسيت مراسيك.. جوة ذاتي

إلّا باكر لما ترجع… أنا بحكى ليك عن الحصل..

وعن بعد المسافة وقربها

ولمن يفارق زول عيون.. غاليات عليه كتير خلاص وبحبها…

والله أحكام يا قدر… والله أحكام يا مسافة ويا سفر

وأنت لما بتسيبني وتسافر..

خت في اعتبارك أنو دنياي في مدارك

وجد- لفافات الصبر دخنتها..

وكل المقاطع في غناي طوعتها

وغريبة غنت… فرحة… لا… لا.. غربة.. لا… لا..

تقصد شنو ما عرفتها

وأهي تجربة…. خطيرة – جد – واجتزتها.. ولسه واحشني

قصيدة بعد ما فات الأوان

من بعد ما فات الأوان

الليلة جاي بتعتذر

ترجع أيامنا الزمان

من وين نجيب ليك العمر

وفرحت بيك مديت

دروب الريد سماح

وغزلتا ليك طيبة

مشاعري غطا ووشاح

لكني وآ ضيعة رجاي

رديتني مكسور الجناح

وسقيتنى بعد الحلوة مرّ

من وين أجيب ليك العمر؟

يا ألبي غرورك كم قسيت

كان ظني فيك تكون حنين

في سكة الشوق بالسنين

وبراي بالنار انكويت

وصليتني بعد الفرقة بين

لحد ما كمل الصبر

من وين أجيب ليك العمر؟

قصيدة أعذريني

أعذرينى

لو عيوني.. غصب عني

وقفوا في عيونك شويّه

وسامحيني لو مشاعري

فاتوا مني وغازولكي بحسن نيّه

شايلة في عيونك شقايا

ارحميني وارتي ليا

عارفة لما تفوتي تمشي تودعيني

تاني ترجع لي سنيني

وأصحى تاني

وأبدأ من أول أعاني

وأبقى مصلوب في الثواني

شان تجيني وتنقذيني

يا ملاذي ويا خلاصي ويا يقيني

خلّصيني

أصلّي غرقان في الأسية

وأعذريني لو عيوني

ارتاحوا في عيونك شويّة.

قصيدة السودان الجديد

يا جمالك يا بلادي جيت أغنيلك نشيد

ما خلاص نادى المنادى (اتولد سودان جديد)

لو عذابك طال كتير وبالسنين مستحملا هو

وضقتي ويلات السعير وشفتي من الويل شقاهو

الشروق ساطع منير والأرض مستنياهو

يبقى كل الجاي خير يمسح القبلو ووراهو

وأنت يا شعبي النبيل فيك ملامح ما بتزول

أنت من أصلك أصيل خاتي كلماته وخاتي قول

أنت يالدغري وعديل أنت يا العارف الأصول

يشهد التاريخ قبيل فيهو مثلت الفصول

نحن لو كان يوم سهينا مرة في عمر الزمان

نحن عهدك ما نسينا ولما حان يوم الأوان

جينا من غربتنا جينا وتاني لي نفس المكان

أتحدنا وبي أيدينا بنغسل الذل والهوان

وابدأ أفرح بيك وأغازل

يا وطن بالعزة حافل وافتخر بيك في المحافل

وأزرعك ورد وسنابل يا وطن عارفك مناضل

والبخونك يبقى هازل يبقى مكتول وأبقى كاتل

وأنظّم الأفراح نشيد ما خلاص نادى المنادي.

أتولد سودان جديد ..أتولد سودان جديد.

قصيدة الحب الكبير

يا بلادي الطيبة جيتك، عندي ليك كلام كتير

أصلي من بدري احتويتك، أنتِ يا حبي الكبير

كنت قبل سنين طويلة

كنت زول هاني وغرير، وكانت الأيام جميلة

والبلاد مليانة خير، والوطن كلو القبيلة

غيرو ما بنرضى البديل

والنفوس كانت نبيلة عامرة بالحب الكبير

السنين لفت ودارت، وعجلة الدنيا بتدور، السنين كتبت وقالت

نحنا شعب صحيح جسور ولو خطوب الدهر نالت

من صفاك لازم نثور، والبدور يزرع ويحصد، ما بيزع بالقشور

ما بلادنا الطيبة جنة عامرة بالخيرات سخيّة

وأنتو طيبين يا أهلنا، بي خصال راسخة وقوية

لو قبيل كنا انشغلنا عن حبيبتنا الوفيّة

ليكي جابتنا المحنة والعرق مهرك هدية.

قصيدة الياسمين

معزورين، ولو عارفين حكايتي معاهو

تعزروني لأنو الماء سقا الياسمين

ما بعرف غلاوة الند، ولا بعرف نداوة خد

ولا بعرف كلام العين، ومعزورين

أريتكم مرة مرة شفتوني، وبيني وبينو بس خطوات

زي عابد وقّف بيأدي في صلوات

وزي والد همس لي جناهو بي دعوات

قولوا عليّ لو قايلين معزورين، وما عارفين

لأنو الماء سقا الياسمين

ما بعرف غلاوة الند، ولا بعرف نداوة خد

وما بعرف كلام العين، معزورين

منو الفيكم بساهر الليل، يبارى سحابة لما تشيل

ويتبع نجمة ضواية مداها بعيد بعيد بلحيل

وقولوا عليّ لو قايلين، معزورين وما عارفين

لأنو الما سقا الياسمين

ما بعرف نداوة خد، وما بعرف غلاوة الند

ولا يعرف كلام العين

قصيدة شقا الأيام

شقا الأيام وسهر الليل بهون لو مرة حسيت بي

يزول كل الوجع وأرتاح

وأغرد زي كنار صدّاح، وتبقى الدنيا في عيني

أزاهر وغيمة وردية، ولو سلّمت مرة علي

سلامك ليّا عيدية

شقا الأيام وسهر الليل، وآهاتي الحزاينية

ملازمني من يوم شفت عيونك الحلوة

ويومها عرفت كيف العين مكامن ريد، وجرة نمة من دوبيت

ضراعة فاتحة يوم العيد

فرح أطفال، وأهازيج زار ونقرة طار، وبحّة ناي

حزين غناي، ترانيم غنوة دينية

براي، والليل، وأهاتي الحزاينية، بيغشاني النعاس مرات

وطيفك يمرّ، يغافلني، يبدل حزني أشراقات

وأبدأ معاك غناوي الليل، وأغالب الدمعة ما بيه تسيل

أتاري الليل كمل كلو؟! عيونك مرة لو طلو

يزول كل الوجع وأرتاح، وأغرد زي كنار صدّاح

وتبقى الدنيا في عيني أزاهر وغيمة وردية

ولو سلمت مّرة عليّ سلامك ليّا عيدية.

قصيدة حبايبنا

حبايبنا

قرايبنا .. وتخاص مونا

وخصامكم لما زاد طول

ولمن إنتو في الأول جرحتونا

قلنا أقلو نتلاقى

تعاتبونا…

تلومونا….

وفي الأخر تصالحونا.. حبايبنا

تغلطوا إنتو ونسامح

ما بنقدر نخاص مكم

ما أصلو الهوى الجامح

بينسينا الخصام كلو

ويهون ظلم الهوى وذلو

والضقناهو من مرو

لما عيونك الحلوين تصابحنا

نرجع نحن مجبورين

نسامحكم… حبايبنا

ولمن زاد خصامكم لينا فات حدو

والقايلنو ببقى هظار

أسفر لينا عن جدو

بحر ريدكم وإنتو بعاد

يوماتي بيزيد حدو

ولما عيونك الحلوين تصابحنا

نرجع نحن مجبورين،

نسامحكم… حبايبنا

وقرايبنا،

وتخاص مونا

قصيدة تباريح

تباريح الهوى

ده الجاني منك ومن تباريح الهوى،

وصفو بصعب يا جميل

وبعدت عنك، ولما طال بي النوى،

بقى لى أسيبك مستحيل،

تبقى سيرتك هى الكلام

وتبقى صورتك هي الرؤى الحلوة البعيشها

في صحوتي، أو حتى في عز المنام

ويبقى اسمك هو الغنا

هو البجفف لي عذابات الضنى

ما الشفتو منك يا منى الروح يا أنا،

وصفو بصعب يا جميل…

وبعدت عنك… ولما طال بي النوى

بقي لي أسيبك مستحيل

بشكي ليكم يا مظاليم الهوى

أصلي مجروح مرتين،

يمكن القى الزيى فيكم

ضاق جراح الحب ومتعذب سنين

ويمكن ألقى وصفة تنفع..

ولا يمكن ألقى حاجة تخفف الجرح القديم..

حاجة تشفع..

ده الجاني منك ومن تباريح الهوى

وصفو بصعب يا جميل

وبعدت عنك، ولما طال بي النوى

بقي لي أسيبك مستحيل

قصيدة أغنية للأطفال

طفل يصرخ في البوادي

دابو في سن الفطام

طفل عز الليل ينادي

يلا نديهو الطعام

وقبلما نديهو لقمة

نفتح الأحضان نضمو

شان يحس طعم الأمان

شان نعوضو فقد أمو

وكل بيت نفتح لي بابو

وكل واحد يبقى عمو

وترجع الضحكة لعيونو

وينسى حزنو وينسى همو

قيمة الأوطان أصيلة

فينا من زمنا قبيل

محنة بتعدي وتزول

مافي أبدًا مستحيل

وبالعزيمة تهون صعاب

والعسير يصبح يسير

ويرجعو الغايبين سنين

تاني للبيت الكبير